SC-in criminal law siam thar chungchang ngaihtuah

Supreme Court chuan sorkar laipuiin criminal law thar a pass tak chungchanga petition theh luh chu nimin khan ngaihtuahin a hnawl. Supreme Court vacation bench-a Justice Bela M Trivedi leh Justice Pankaj Mithal te chuan criminal law thar khinna petition hi an ngaihtuah a ni.

Petition theh luttu hi advocate Vishal Tiwari niin, dan thar hi hmang loa stay a duh thu a tarlang. Vishal Tiwari chuan criminal law thar parliament-a pass chu sawihona mumal a awm lo a ni tiin, pass a nih lai hian eptu party MP tam zawk chu suspend an nih thu a tarlang. Petition-ah hian court chu criminal law thar hman theih a ni em tih zir chiang tura committee din turin a ngen bawk. "Criminal law tharte hi a tak takah chuan police thuneihna belh chhahtu, mipuiin dikna chanvo an neihte palzutna a ni. British hunlaia dan siam kha râwng leh innekchepna angin sawi mah se, kha danah khan police-in mi an man chu ni 15 bak an hreng thei lo a, criminal law tharah hi chuan ni 90 leh a aia tam pawh an hreng thei a ni," tiin petition-ah hian Tiwari chuan a tarlang.

Hetih lai hian court chuan nimina petition a ngaihtuah hnu hian a hnawl a, Tiwari petition theh luh chu fiah tawk lo leh, ti ve mai mai anga a lan thu tarlangin, hnuhlet anga hnawl a nih thu leh, petition theh luttu hnenah chuan pawisa chawitir loa an ngaihdam hram tur thu an sawi a ni. Justice Trivedi chuan criminal law tharte chu hman a la nih loh thu a sawi zui bawk.

Nikum December 21-a parliament winter session neih a nih khan India rama misual hremna dan hman lai pathum; Indian Penal Code (IPC), Code of Criminal Procedure (CrPC) leh Indian Evidence Act te thlakna atan Bharatiya Nyaya (Second) Sanhita, Bharatiya Nagarik Suraksha (Second) Sanhita leh Bharatiya Sakshya (Second) Bill te chu pass a ni.