Karnataka-ah khawkheng vangin khaw 2,207-ah tui harsatna tawk

Karnataka Rural Development and Panchayati Raj (RDPR) minister, Priyank Kharge chuan an state-in khawkheng an tawrh avangin khaw 2,207 chuan tui in turah harsatna an tawk mek niin a sawi.

RDPR minister Kharge chuan kum hmasa lama southwest leh northeast monsoon an dawn loh avanga khawkheng chu thleng a nih thu tarlangin, tui in tura harsatna tawk khuate pui tur hian sorkar chuan a theih ang ang a tih thu a sawi tel bawk. "Khaw 548-te chu tanker 846 hmanga tui in tur pek an ni a, khaw dang 1,659-te hi mimal tuichhunchhuah 2,098 hawhsak hmangin tui in tura an harsatna sukiang tura puih an ni bawk. Thingtlang khuate bikah hian State Disaster Response Force (SDRF) sum hmanga ṭanpuina pek hmasak an ni," a ti.

Tui in tur pek a nih theih nan hian Kharge chuan SDRF sum bawm bakah state department of Rural Drinking Water and Sanitation sum bawm aṭang pawhin pawisa hman tel a ni tiin, kum kal lai mek 2024-2025 atan RDPR sum bawm aṭanga Rs. vbc. 20 hman tawh a nih thu RDPR minister chuan a sawi bawk. "Multi village scheme 480 kalpui mekah khaw 6,828 tan tui in tur pek chhuah mek a ni a, heng scheme-te hi lui tui hmanga tihpuitlin niin, lui hnar lama tui a ṭhat phawt chuan eng emaw chen chu a daih ang," a ti. Karnataka chu khawkhen duhna hmun a nih thu te, kumina khawkheng a nasat zual thu te, sorkar chuan RDPR department kaltlanga thingtlang khua tui in tura harsatna tawk mekte ṭanpui tura ni tina hma a lak reng thu te a sawi a ni.