ED-in June 2 hnua Kejriwal hren chhunzawm an dil

Delhi excise policy-a pawisa tichingpena puh a nih avanga Enforcement Directorate (ED)-in an man, Lok Sabha inthlan campaign avanga court-in June 2 thleng bail-a a chhuah, Arvind Kejriwal chu hren chhunzawm a nih theih nan ED-in court-ah dilna an theh lut.

ED hian special judge, Kaveri Baweja hnenah Arvind Kejriwal hren chhunzawm dilna hi an theh lut a, dilnaa an tarlan danin Kejriwal hren theih hun chhung tura court-in phalna a pek hi May 27 hian a tawp dawn a, hei vang hian Supreme Court-in bail-a a chhuah lailawk Kejriwal hi June 2 hnua amah inpe leh tura tih a nih angin, ni 14 hren chhunzawm a nih theih nan an dil a ni. ED hian excise policy thubuaia an man, Arvind Kejriwal leh Bharat Rashtra Samithi (BRS) hruaitu, K. Kavitha te chungthu hi ngaihtuah a nihna turin finfiahna an ngah tawk tawh thu an sawi.

He thubuai kaihhnawihah hian ED chuan Kejriwal leh Kavitha te lakah hian chargesheet an theh luh belh a, court chuan ED chargsheet theh luhte hi ngaihtuah zuiin, AAP leh BRS hruaitute chungthu hi ngaihtuah tura dah a ni dawn em tihah thutlukna a la siam dawn a ni. Hetih lai hian court hian Kavitha hi June 2 thleng hren a nih theih nan thu a chhuah tawh.