Gujarat ATS-te'n IS firfiak pali an man

Gujarat Anti Terrorist Squad (ATS) chuan Sri Lanka mi, Islamic State (IS) helpawla tel ni ngeia hriat mi palite chu Ahmedabad airport-ah an man. IS hi India-in helpawl a khap zinga tel a ni.

Thawhṭanni khan Gujarat ATS-te chuan Pathianni zana thu rintlak tak an dawn bawhzuiin Sardar Vallabhai Patel airport, Ahmedabad-ah Sri Lanka khawpui, Colombo aṭanga thlawhtheihna lo lut an lo chang a, he thlawhtheihna aṭang hian IS helpawl mi nia hriat mi palite hi an lo man ta a ni. Gujarat Director General of Police (DGP), Vikas Sahay chuan mi pali an man; Mohammad Nusrat, Mohammad Faarukh, Mohammad Nafran leh, Mohammad Rasdeen te hi IS aiawha India rama firfiaka chet tuma lo kalte an nih thu sawiin, man an nih hnu lawk hian Ahmedabad khaw chhunga an ralthuam hman tur ni ngeia hriat, Pakistan siam pistol leh cartridges 20 an man tel thu a sawi bawk.

Police-in thu an zawh fiahna aṭanga an tarlan danin, an mi mante hi India-in an pawl khapna a lo siam tawh tho, Sri Lanka-a kalfawr pawl, National Thowheeth Jamath (NJT)-a tel ṭhinte an ni a, hemi hnu hian Pakistan mi, Abu Bakr Al Bagdadi kaihhruaina hnuaiah IS hi an zawm ta a ni. February-a IS an zawm hnuah Bagdadi hian India-a firfiaka chea, pawikhawihna thlen turin a tir a, thihchilh bomb thlenga hman an inhuam thu an sawi bawk. Heng mi palite hi Indian Penal Code (IPC) leh Arms Act bakah Unlawful Activities Prevention Act (UAPA) hmanga thubuai siamsak nghal an ni.