India-in Iran President sunna hun hmang

India chuan nimin khan Thawhṭannia helicopter chetsualnaa boral, Iran president Seyes Ebrahim Raisi sunna hun a hmang.

Sorkar laipui thuchhuaha tarlan a nih angin, President Raisi sunna atan hian nimin khan India ram puma regular taka flag tar ṭhin zawng zawngte chu a ngul chanveah pawh hniam a ni a, hei bakah hian sorkar laipui pawhin sorkar kaihhnawih hna, official-a tih ṭhin zawng zawng pawh a chawl bawk. Iran President Raisi thih thu hriat a nih hian prime minister Narendra Modi chuan a ui thu post-in, Raisi-a'n India leh Iran inzawmna tinghet tura a hmalakna zawng zawng ropui leh hriatreng tlak a tih thu a tarlang a ni. External affairs minister, S. Jaishankar pawhin Iran mipuite a tawrhpui thu sawi ve bawkin, President Raisi nena inbiakna an neih fo tawh dante a sawi tel bawk.

Iran president Seyes Ebrahim Raisi hian kar hmasa khan Iran-a East Azerbaijan province-a tuikhuah a hawng a, ani bakah hian foreign minister, Amir Abdollahian leh sorkar official eng emaw zat an tel. Tuikhuah hawnna aṭanga an haw lamah an chuanna helicopter hi chesualin, Pathianni khan chin hriat lohin a awm a, Thawhṭanni khan helicopter hi hmuh niin, President Raisi leh foreign minister, Abdollahian te hi an thi tih puan a ni ta a ni.