Assembly inthlan result puang Mamata leh Jaya-te chak chhunzawm

Assembly inthlan neihna - Assam, Kerala, Tamil Nadu, West Bengal leh Puducherry-a vote tla-te chu nimin khan chhiar niin, result puan nghal a ni. Congress chu a sorkarna state pahnihah a chak zo lo a, BJP chu a sorkar ngai lohna state pakhatah a chak thung.

Assam state-ah chuan kum 15 zet rorel tawh, Congress party chuan hnehna a chang zo lo a, BJP chu rin phak baka che ṭhain sorkar thar a siam thei dawn ta a ni. Assam state hi hmarchhak biala BJP sorkarna state hmasa ber a ni dawn ta a ni.

Kerala-ah pawh rorellai, Congress kaihhruai United Democratic Front-in hnehna a chang zo lo. Puducherry-ah DMK-Congress thawkdunte an chak thung.

West Bengal leh Tamil Nadu-ah chuan sorkar lai, Trinamool Congress leh AIADMK-ten hnehna an chang chhunzawm a, Mamata Banerjee leh J Jayalalithaa-i te chuan chief minister term hnihna an chelh thei dawn ta a ni.

Tamil Nadu-ah rorellai, AIADMK-in hnehna a chan leh tak avangin, an party hotu leh Chief Minister J Jayalalithaa-i chu kum 32 chhunga an state-a CM term hnih a zawna chelh thei awmchhun a ni dawn. Result chhiar hmaa exit poll-ah AIADMK hi a chak zo dawn lo nia tarlan ni mah se, DMK leh Congress ṭangrualten an hneh zo ta chuang lo a ni. AIADMK hian inthlan dawna campaign-naah mipui-te hnena a thlawna thil sem tur a tiam nasa hle a, heng zingah hian Cellphone a thlawna semte a tiam tel a, hmeichhia scooter lei duhte tan 50%-a tihtlawm sakte a tiam bawk.

Assembly seat 140 awmna, Kerala-ah chuan rorellai Congress kaihhruai United Democratic Front a chak zo lo a, CPM kaihhruai Left Democratic Front chuan seat 90 chuang lain sorkar a siam dawn a, BJP chuan a ṭum khatna atan MLA pakhat a nei ve bawk. BJP MLA tling awmchhun hi kum 86 mi, Union minister hlui O Rajagopal a ni. Kerala-a Congress chief minsiter Oommen Chandy kaihhruai sorkar hnuaia official leh minister ṭhenkhatte chu eirukna lama hmingliauna nasa tak an neih avangin hei hian inthlanah nghawng a neih phah hle nia rin a ni.

West Bengal-ah Chief Minister Mamata Banerjee kaihhruai, rorellai Trinamool Congress (TMC) a che ṭha hle a, inthlan hmasa aiin MLA a ngah dawn zawk a ni. Mamata Banerjee chuan inthlan dawn campaign-naa eptuten rorellai dawt hmang-a nasa taka an beihna chu mipuiten an hrethiam vek a ni tiin, dik lo taka inbeih chu mipuiten an duh lo a ni, a ti.

Puducherry-ah Chief Minister N Rangasamy kaihhruai All-India NR Congress (AINRC) sorkar chuan DMK-Congress
ṭangdun a hneh zo lo a, ṭangrual sorkar thar a ding dawn a ni.

Tun ṭuma state pali leh UT pakhata inthlan neihnaah hian BJP chuan nasa takin hma a sawn a, hetihlai hian Congress party erawh a che chhe hle thung. BJP hi a inpharhzau zel a, tunah hian state 9-ah sorkarna siamin, state dang pali-ah party dang nen
ṭangrual sorkar an siam bawk.

Congress party chuan a sorkarna state pahnih - Assam leh Kerala a chan belh leh a, Uttarakhand-a Chief Minister Harish Rawat-a kaihhruai Congress sorkar pawh a dinhmun a nghet lo hle nia sawi a ni bawk. Congress party hian state 29 zingah state paruk-ah chauh sorkarna a siam tawh a ni.

Prime Minister Narendra Modi chuan CM term hnihna chelh thei tura hnehna changtu, Mamata Banerjee leh J Jayalalithaa-i chu telephone-a biain, a lawmpui thu a hrilh. PM chuan kum danga hnehna an la chan ngai lohna, Assam-ah BJP-in hnehna a chang thei chu thil chhinchhiahtlak leh ropui tak a ni tih a sawi. PM chuan, "India ram mipuite chuan BJP-ah rinna an nghat ngam zel a, kawng tinrenga hmasawnna thlen theitu a ni tih an hmuthiam tawh a ni" a ti. State hrang hrangah BJP chu an che
ṭha hle niin a sawi.