Bihar-ah inthlan zawha buaina chhuak avangin mi pahnih thi

Lok Sabha inthlan thawh ngana, May 20-a neih zawh tukah Bihar-a Saran constituency-ah Bharatiya Janata Party (BJP) leh Rashtriya Janata Dal (RJD) thlawptute intibuaiin, mi pahnihin nunna an chân a, mi pakhatin hliam a tuar. Saran Lok Sabha seat-ah hian RJD aṭangin Lalu Prasad-a fanu, Rohini Acharya a ding a, BJP aṭangin Rajiv Pratap Rudy chuan a chuh ve bawk a ni.

Saran Lok Sabha constituency-ah hian inthlanna hi May 20 khan neih a ni a, hemi ni hian RJD candidate Acharya chuan polling booth 118-na; Bhikhari Thakur Chowk hi tlawhin, helai hmunah hian mi ṭhenkhat nen an inhnial a, polling booth a kalsan leh hnu hian mi ṭhenkhat lunga an invawm zui thu leh, hliam tuar an awm thu an sawi. Inthlan tuk, May 21 khan Bhikhari Thakur Chowk-a Bada Telpa primary school bulah BJP thlawptute leh RJD thlawptute inkarah buaina chhuak chhunzawmin, silai hmeh puah a nih thu police-te chuan an sawi a, a hmunah hian mi pakhat thiin, pakhat chu hospital thlenpui a nih hnuah a thi thung. Mi pakhat dang leh chu Patna medical college and hospital-ah enkawl mek a ni. Mitthi bakah hian hliam tuar eng emaw zat an awm niin police-te chuan an tarlang.

Saran Superintendent of Police (SP), Gaurav Mangla chuan chuan buaina chhuak hi an hriat veleh a hmunah kalin buaina chawk chhuaktu nia hriatte an man thu a sawi a, Saran-ah hian darkar 48 chhung internet tihtawp nghal a ni tih a sawi. SP Gaurav hian buaina chhuak chu khawtlang hmelmate chawh chhuah a nih thu sawiin, inkahna a thlenna hmunah hian duty an indah rih tur thu a sawi tel bawk.