India-in pheikhawk len zawng tehna hran nei dawn

India sorkar chuan khawvel pum huapa UK, US leh Europe-te'n pheikhawk len zawng tehna an nei angin, India mipui mil tura duan, pheikhawk len zawng tehna hran; 'Bha' an tih chu siam mek a nih thu a puang.

Sorkar laipui Commerce Ministry hnuaia Department of Promotion of Industry & Internal Trade (DPIIT) puihnain, Central Leather Research Institute (CLRI) chuan India hman tur pheikhawk len zawng tehna, Bha hi an siam a ni. CLRI director, KJ Sreeram chuan Bha chu India mite ke mil tura duan a nih thu sawiin, he ke tehna siam tur hian India ram pum chu zone pangaa ṭhenin survey an neih thu a tarlang.

Hemi chungchangah hian CLRI chief scientist Md Sadiq chuan, India mi tam zawk chu an ke len zawngah hian an kum, ṭhan dan leh mipa leh hmeichhia nihna avangtein danglamna a awm nasa tih sawiin , tuna tehna hman tlanglawnah hi chuan India mite chuan an pheikhawk bun tawk lei fuh an harsat thu leh, online-a chahte pawhin thawn let leh an tam thu a sawi.

Sadiq chuan India mite'n pheikhawk len zawng tehna avanga harsatna an tawhte sutkian a nih theih nan a hrana tehna siam chu kawng awm chhun a ni tiin, Bha tehfung aṭang chuan mihring ke chu a hlai zawng teh tel tur a nih thu a sawi a, hei hian ke pian leh len dan hrang hranga harsatna awm a sutkian a beisei thu a sawi. Hei hi UK, US leh European te tehna aṭanga a danglam bikna tur langsar tak a nih thu a sawi tel bawk a ni.

Bha hi enchhinna neih mek a ni a, research pawh neih chhunzawm zel tur a la ni. A buaipuitute chuan kum 2025-ah hman theih tura an peih hman an rin thu sawiin; loneitu an ni emaw, sipai an ni emaw, hmeichhe hnathawk chi an ni emaw, mi zawng zawng huap kima siam an tum thu an sawi.