Kyrgystan-a buaina avangin India mi medical zirlaite exam chungchangah harsatna tawk thei dinhmunah an ding

Kyrgystan-a buaina chhuak avangin Maharashtra aṭanga medical zirlai awm 500-te chuan exam chungchangah harsatna an tawh a hlauhthawnawm thu Hingoli thuneitute chuan an sawi. Zirlai nu leh pate chu buaina an nei a nih chuan district disaster management office be pawp turin an chah.

May 18 khan Kyrgystan khawpui, Bishkek-ah tualchhung mite chuan Pakistan zirlaite beiin buaina a chhuak a, tualchhung mite hian ram pawn lam mi zirlaite an bei nia hriat a nih avangin Kyrgystan-a ram pawn mi zirlai awmte an thlabar hle a ni. Sorkar laipui pawhin Kyrgystan-a India zirlai awmte chu pawn chhuak lo turin May 19 khan thu a lo chhuah tawh a ni.

Kyrgyzstan-a thuneitute chuan heng zirlaite dinhmun hi zir chiangin, online-a an exam theih dan tur ngaihtuah an tum thu an sawi a, zirlaite hi thla tharah chuan India-a an haw theih an beisei thu an tarlang bawk. External Affairs Minister, S. Jaishankar chuan zirlaite chu Kyrgyzstan-a Indian embassy nen inbe pawp reng turin a chah a, India embassy hian tun dinhmunah chuan zirlaite tan hlauh tur a awm loh thu leh, zirlaite dinhmun an thlithlai reng thu an sawi. Kyrgyzstan-ah hian India mi zirlai bakah sumdawng mi 17,000 an awm a ni.