FSSAI-in Everest leh MDH masala-ah ethylene oxide an hmu lo

India rama ei leh in tur him leh him loh chungchang bakah, zir chianna leh thununna kawnga thuneitu sang; Food Safety and Standards Authority of India (FSSAI) chuan Everest leh MDH siam masala-ah te ethylene oxide an hmuh loh thu an puang.

Everest leh MDH siam bawlhlo, a bikin masala-ah te hian cancer thlen theitu langsar tak nia sawi, ethylene oxide a awm nia sawiin, Hong Kong leh Singapore te chuan an rama lak luh an lo khap tawh a, Nepal pawhin kar hmasa khan khapna a lo tichhuak tawh bawk. Hei vang hian FSSAI chuan Everest leh MDH siam masala-te hi ram chhunga laboratoy hrang hrang 28-ah endik turin sample an la a, hriat theih chinah ethylene oxide hi hmuh a ni lo a, laboratory paruk result an la nghak mek thung.

Masala sample laa, ethylene oxide a awm leh awm loh endiknaah hian Spice Board-a tel scientist hmingṭha tak tak bakah, CSMCRI (Gujarat), Indian Spice Research Institute (Kerala), NIFTEM (Haryana), BARC (Mumbai), CMPAP (Lucknow), DRDO (Assam), ICAR, National Research Centre on Grapes, (Pune) te an tel a ni.