Rahul-a'n Agniveer scheme tihtawp leh loneitute leiba ngaihdam a tiam

Congres party hruaitu Rahul Gandhi chuan Haryana-a Lok Sabha election rally a neih hmasak berah prime minister Narendra Modi na taka a bei a, 'A hmingṭhatnate a hloh tawh a ni,' a ti. Central-a sorkarna an chan chuan BJP kaihhruai NDA sorkarin sipai lakna dan thar a siam, Agniveer scheme chu tihtawp a tiam a, loneitute leiba ngaihdam a tiam bawk.

Charkhi Dadri-a INC candidate, Rao Dan Singh tana rally a neihah, Rahul Gandhi chuan, Agniveer scheme chungchang sawiin, "PM Modi chuan India sipaite chu hlawhfa chhawr ang maiah a siam tawh a ni," a ti.

Agniveer scheme chu Army lam buatsaih pawh ni loin, Prime Minister Office buatsaih a nih thu sawiin, "Eptu ṭangrual pawl INDIA bloc-in sorkarna an chelh a nih chuan he scheme hi bawlhhlawh bawmah paih a ni ang," a ti bawk.

Loneitute dinhmun sawiin, Rahul chuan, "Loneituten mi hausa ṭhenkhat chunga a tih anga an leibate ngaidam ve tura Modi an ngenna chu Modi chuan chutianga tih chuan loneitute chu a tichhe zawk mai mai ang, tiin a lo hnial tlat a ni," a ti. INDIA-in thuneihna an chang a nih chuan loneitute leiba neihte chu ngaidamin, an thlai hralhna turah pawh Minimum Support Price siamsak ngei a tiam a ni.