BJP-in an party aṭangin Bhojpuri film star Pawan Singh an hnawt chhuak

BJP chuan Bhojpuri film star leh singer lar Pawan Singh chu an party duh dan kalha chet a, party hmel tichhiaah puhin an party aṭangin a hnawt chhuak.

'Power Star' tia hriat lar Pawan Singh hian kum 2017 khan BJP a zawm a, mahse, tun ṭum Lok Sabha inthlanpuiah Bihar-a Karakat biala indepedent candidate-a chuhin, BJP-in National Democratic Alliance (NDA) candidate atan a dah Rashtriya Lok Morcha (RLM) leader Upendra Kushwaha a khing a ni. BJP hian a hmain Pawan Singh hi Asansol biala ding turin a ruat a, mahse, mimal lamah harsatna a nei tiin a lo hnawl. Chumi hnuah Karakat bialah hian independent candidate niin a chuh leh ta tho a ni.

Pawan Singh-a nu, Pratima Devi pawhin May 14 khan Sasaram bialah independent candidate-a din tumin nomination paper a lo thehlut tawh a, mahse, a hnu rei lo teah a inhnukdawk leh nghal.

BJP, Bihar unit chuan, "Lok Sabha inthlanpui neih turah NDA official candidate i khing a, hei hi party inkaihhruaina kalh a ni a, i chet dan hian party hmel a tibal hle a ni," an ti a, an party aṭanga hnawhchhuah a nih thu an hriattir a ni.