BJP-in seat 310 kan la tawh : Amit Shah

Union Home minister Amit Shah chuan Lok Sabha inthlan neih mekah, vote thlak thawh nga neih tawh aṭangin BJP-in seat 310 an la tling tawh niin a sawi. Vote thlak thawh hnih la awm tur nen BJP hian a pumpuia an target seat 400 a khum dawn a ni, a ti.

Amit Shah hian nimin khan Odisha-a Sambalpur Lok Sabha constituency-ah public meeting a nei a; tuna inthlan hmachhawn mek chu India ram chak zawka siamna tur leh, a vawi thumna atana Narendra Modi a prime minister lehna tur a ni, tiin a sawi.

Chief minister Naveen Patnaik chu na taka beiin, an state-ah Babu culture kalpui a, Odia culture zah lohah a puh. "Odisha hi natural resource ṭha tak nei a ni chungin a rethei hle. Leilung hausakna an neihte chu Naveen Patnaik duhsak zawng mi hausaten an ru vek a ni," a ti.

Odisha chu state hausa, an ṭhalaite state danga hna thawh tur zawnga an kal a ngaih tawh lohna hmunah an siam dawn thu Amit Shah chuan a sawi bawk.