Vawiinah Lok Sabha inthlan thawh rukna; State leh UT pasarihah vote thlak dawn

Election Commission of India (ECI)-in Lok Sabha inthlan 2024 neih dan tura ruahmanna a siam zulzuiin, vawiin hian inthlan thawh rukna neih tur a ni a, state paruk leh union territory (UT) pakhataa constituency 57-ah vote thlak a ni ang.

Vawiina inthlang tur state-te hi Bihar aṭangin seat pariat, Haryana-ah seat 10, Jharkhand aṭangin seat pali, Odisha-ah seat paruk, Uttar Pradesh-a seat 14, West Bengal seat pariat leh Delhi Union Territory aṭangin seat pasarihte an ni. Inthlan thawh ruknaah hian Delhi leh Haryana-a Lok Sabha seat zawng zawngah inthlan zawh nghal a ni dawn a, heti hian inthlan thawh khatna aṭanga thawh rukna thleng hian state leh UT 28-ah inthlan zawh fel a ni dawn a ni.

Inthlan thawh ruknaah hian constituency 57 aṭanga chuh tur candidate 869 an awm a, Haryana-ah tam berin, candidate 223 an awm a ni. Candidate zingah hian pawikhawih thubuai nei 180 an awm a, candidate 12 chu an thubuaia thiam loh chang an awm bawk. Party anga lakin BJP candidate 51 zinga 28-in thubuai an nei a, Congress candidate 25 zinga pariatin thubuai an nei bawk a ni. Delhi-a seat panga chuh tur, Aam Admi Party (AAP) candidate pangate chu thubuai nei lai vek an ni bawk a ni.

Candidate-te hausakna, Association for Democratic Reforms (ADR)-in a tarlan danin, crorepati (cheng vaibelchhia nei tling) candidate 338 an awm a, candidate awm zawng zawnga aṭanga 39% a tling pha. Candidate hausa ber chu Haryana-a Kurukshetra constituency-a ding tur BJP candidate Naveen Jindal niin, Rs. vbc. 1,241 chuang nei anga chhut a ni. Candidate rethei ber chu Haryana Rohtak constituency-a Independent candidate, Master Randhir Singh niin, Rs. 2 nei niin an tarlang bawk.

Party lian zual zingah BJP candidate 51 zinga 48-te chu crorepati an ni a, Congress candidate 25 zinga 20-te chu crorepati niin, AAP candidate panga zinga pali, BJD candidate paruk zinga paruk, RJS candidate zawng zawng (4) leh JD(U) candidate zawng zawng (4) te chu crorepati an ni bawk.