"Congress-in vote an hmuhna tur leh quota paihsak zawngin politics khel" - PM Modi

Prime minister Narendra Modi chuan Lok Sabha inthlan thawh rukna neih tur puala Haryana leh Punjab-a campaign rally a neihnaah Congress leh eptu party ṭangrual pawl, INDIA chu vote hmuh nana politics khel leh constitution-in quota a siam pawh paih tumah a puh.

Haryana-a Bhiwani-Mahendragarh Lok Sabha constituency-a BJP candidate Dharambir Singh campaign chu PM Modi hian puiin thu a sawi a, tun hnaia West Bengal High Court-in OBC certificate nuai nga a cancel-sak tak leh an tana reservation siamte chu pawn lam mi hnenah pek tum a nih thu a sawi. "West Bengal chief minister, Mamata Banerjee chuan heng quota-te hi Muslim tana pek a tum thu a sawi a ni. Congress emaw, TMC emaw, INDIA-a party tute pawhin an vote humhimna tura hengho lam an ṭan lai hian in tan tu nge ding ve dawn?" tiin, a thu sawi chu inthlan thutiam mai ni lo a, nekchepa awmte chanvo humhimsaktu a nih thu PM Modi chuan a sawi.

PM Modi chuan INDIA-a thawkhote chuan an vote hmuhna humhim nan eng pawh tih an hreh lo a ni tiin, "Congress hian tihdan an nei a, 'Ram' tih sawi vang ringawtin mi an man thei. Congress sorkar chhung khan Ram Mandir siam phal a ni lo a, din a nih hnuah pawh a hawnna kha an boycott hial a nih kha. Tunah pawh an hruaitu Rahul Gandhi chuan thlan tlin an nih chuan Ram Mandir khar a tum thu a sawi leh tawh," tiin a tarlang. "Congress hian sorkarna an siam ngai dawn lo a, vote hmuhna tur chauh zawngin, dinhmun chhe zawkte tana quota siam pawh an dodal zel a, hei hi an politics khelh duh dan a ni," a ti.