Thane, Maharashtra-a khawl puakah mi pasarih an thi, mi 48 an hliam

Maharashtra-a Thane Municipal Corporation chuan Ningani khan Dombivali MIDC area phase 2-a Amudan chemical company factory-a khawl hman pakhat puakah mi pasarih an thih thu leh, mi 48-in hliam an tawrh thu an sawi.

Thuneitute tarlan danin, factory-a khawl hi vawi thum vawi li vel a puak a, meikhuin helai chhehvel hi khuh nghal vekin, mihring chenna chinah pawh factory kang hi lum an tih phak thu an sawi. Thi leh hliam hriat theih chin bakah hian factory-a thawktu eng emaw zat chu an la tang niin an sawi a, an chin hriat a nih loh avangin chhanchhuah hna thawktute chuan an la zawng mek niin an tarlang bawk.

Factory-a khawl puah chhan hi uluk taka chhui turin district thuneitute chu hriattir an ni tawh a, khawl puak avanga kangmei chhuak chhunzawm tur pawh thunun tawh niin, chhanchhuah hna thawh a nih bakah, mawhphurtu hriat an neih chuan an laka action na taka lak a nih tur thu thuneitute chuan an sawi a ni. Maharashtra chief minister, Eknath Shinde chuan hliam tuarte enkawlna senso zawng zawng chu sorkarin a peksak tur thu a puang a, nunna chânte tana zângnadawmna pawh kar khat chhunga an pek tur thu a sawi tel bawk a ni.