May thla chhungin sorkar thar lakluh an ni dawn

Kumina assembly inthlan neihna, state pali leh union territory pakhata inthlan result chu puan a ni ta a, West Bengal leh Tamil Nadu-ah rorellai party-te an chak leh a, BJP chuan Assam a ṭum khatna atan hnehna changin Kerala-ah MLA a vawikhatna atan a nei bawk.

West Bengal Chief Minister Mamata Banerjee leh Tamil Nadu Chief Minister J Jayalalithaa-i chuan eptuten ṭang≠rualin bei mah se, an party chu an chakpui leh thei a ni.

BJP chu kawm 15 zet Congress in ro a relna, Assam-ah rin phak baka che ṭhain, party malin sorkarna siam thei khawpin a chak a, mahse Asom Gana Parishad leh Bodoland People's Front-te nen an thawkho dawn a ni.

Kerala-a rorellai, Congress kaihhruai United Democratic Front (UFD) chu eirukna lama hminghliauna nasa tak a neih hnuah, CPM kaihhruai Left Democratic Front (LDF) lakah a tlawm. Puducherry-ah rorellai All India NR Congress (AINRC) chuan DMK-Congress party thawkdun a hneh zo lo bawk.

West Bengal :

Mamata Banerjee kaihhruai Trinamool Congress chu inthlan hmasa aiin a che ṭha zawk a, assembly member 294 awmnaah member 210 zet a nei pha. Banerjee hian TMC Legislature party hruaitu atan lungrual taka thlan nghal a ni a, May 27 hian Chief Minister term hnihna chelh turin lakluh a ni ang.

Rorellai TMC paihthlak theih beiseia Left-Congress thawkdun chuan seat 75 chiah an la pha. Mamata chuan ṭangrual pawl hi na taka sawiselin, "Left hruaitu hmasial takte chuan an hloh ta zawk a ni. Congress pawhin thuneihna chan a duh luata an party thurin bawhchhiain Left an thawhpui a ni" a ti. Amah paihthlak tuma phiarrukna hrang hrangte lakah hnehna ropui tak an chang ta tih a sawi. BJP pawhin West Bengal-ah hian
ṭan la hle mah se, seat ruk chiah a la thei a ni.

Mamata Banerjee chuan in≠thlan dawna an party manifesto-a an tarlante chu a taka tihlawhtling ngei an tum dawn tih sawiin, an state hmasawnna turin theihtawp an chhuah dawn tih a sawi.

Tamil Nadu :

Tamil Nadu state-ah hian rorellai party a zawna an tlin nawn ṭum hnihna a ni a, kum 32 chhunga a thlen ṭum khatna a ni bawk.

Chief Minister Jayalalithaa-i kaihhruai AIADMK chu result puan hmaa exit poll-ah a chak zo dawn lo nia tarlan ni mah se, result chhiar hnuah member 234 awmna house-ah seat 135 zet a la pha tih nemngheh a ni.

Kum 68-a upa, Jaya-i hi a hriselna a ṭha vak lo a, mahse a ṭum li-na atan Tamil Nadu chief minister a ni leh dawn ta a ni.

Eptu pawl lian ber, DMK president, kum 93 mi M Karunanidhi chuan an party-in hnehna an chan chuan chief minister a nih tur thu a sawi a, mahse hei hian an party dinhmun a tihchhiat phah zawk nia rin a ni. Tamil Nadu-ah hian Third Front an la lian thei lo. Regional party lian pahnih AIADMK leh DMK-te dinhmun tiderthawng thei tur nia insawi, DMK leh a thawhpui party-te chuan seat khat pawh an la zo lo.

AIADMK hian nimin khan Legislature party meeting a nei nghal a, party hruaitu atan Jaya-i thlan leh a ni a, May 23 hian CM atan lak luh a ni ang.

Assam:

Assam-ah kum 15 zet sorkarna lo chelh tawh, Congress party chuan seat 126 awmah seat 24 chiah a la pha. BJP leh a thawhpui party-te chuan seat 86 zet lain sorkar thar an siam dawn a, BJP-in Assam state-a sorkarna a chelh ṭum khatna tur a ni.

BJP kaihhruai sorkar thar hi May 24 hian lak luh a ni dawn a, lakluh inkhawm hi Prime Minister Narendra Modi pawhin hmanpui a tum. Sorkar thar lak luh inkhawm hi mipui tam zawk an tel theihna turin Guwahati-a Khanapara field-ah neih tum a nih thu chief minister thar tur Sarbananda Sonowal chuan a sawi.

Kerala :

Kerala-a rorellai, United Democratic Front (UDF) paihthlatu, Left Democratic Front (LDF) chuan assembly seat 140-ah seat 88 a la a, UDF hian seat 50 chauh a la pha. Kerala-ah hian a ṭum khatna atan BJP chuan MLA a nei bawk.

UDF sorkar-a official leh minister ṭhenkhatte chu thamna lak leh eirukna thilah an hmingchhia a, hei hian inthlanah pawh an dinhmun a tihchhiat phah nia ngaih a ni.

LDF sorkar thara Chief Minister tur hi nimin khan tihfel a ni a, Communist Party of India-Marxist in State Secretariat-a meeting a neihah CM atan hian politburo member, kum 72 mi Pinarayi Vijayan chu thlan a ni. CM nih inbeisei, CM hlui VS Chuthanandan (92) chu thutlukna siamah a lawm lo, meeting-na hmun aṭangin a chhuak tau nia sawi a ni. Chuthanandan hi inthlan dawna campaigner langsar ber zing niin, LDF chetṭhatna chhan pakhat nia ngaih a ni.

Puducherry :

Puducherry assembly in≠thlana hnehna changtu, Congress-DMK sorkar thar chu kar leh khian lakluh a ni ang. Seat 15 latu, Congress party chuan karleh kartin lamah Legislature party hruaitu, Chief Minister thar tur an thlang dawn a ni. Congress-DMK ṭangrual hian seat 30 awmah seat 17 an la a, rorellai AINRC chuan seat riat chauh a la thung. Thlan tlin zingah hian Congress chief minister hlui leh assembly neih lai meka eptu hruiatu V Vaithilingam pawh a tel a ni.