Director ruat loh vangin IOC, GAIL leh ONGC pawisa chawitir

India sorkar hnuaia oil sawngbawlna leh hralh chhuah kawnga company lian; Indian Oil Corporation (IOC), Oil and Natural Gas Corporation (ONGC) leh GAIL (India) Ltd. te chu a zawna a ṭum li nan, director an ruat loh avangin pawisa chawitir an ni.

Stock exchange filings-a tarlan a nih danin, January-March quarter chhungin Indian Oil Corporation (IOC), Hindustan Petroleum Corporation Ltd. (HPCL), Bharat Petroleum Corporation Ltd. (BPCL), Oil and Natural Gas Corporation (ONGC), Oil India Ltd. (OIL), GAIL leh, Mangalore Refinery and Petrochemicals Ltd. (MRPL) te hian danin company-te a phût ang thil an tihhlawhtlin loh avangin Rs. vbc. 34 an chawitir tawh a ni. Heng company-te hian quarter hnuhnung pathumah khan tuna pawisa chawitir an nih chhan vang bawk dan hmang hian pawisa an lo chawi tawh bawk. Stock exchange kalphungah chuan company-te hi independent director nei tura beisei an ni a, board-ah hian hmeichhe director pakhat tal dah tura beisei an ni bawk.

Pawisa chawitir an nih chungchangah hian company-te hian stock exchange khawihtu lian, BSE leh NSE hnenah pawisa chawitir an nihna quarter chu March 31, 2024-ah a tawp tawh thu sawiin, director ruat chu sorkar khawih thil a nih avanga an inrawlh ve loh thute an tarlang a ni. IOC chuan,"Director ruat chungchang hi sorkar laipui kuta awm leh an khawih thil a ni a, tun dinhmuna director inruat kim lo leh board-a hmeichhe director awm lo hi kan inthahdah vang emaw, kan ngaihthah vang a ni lo," tiin an tarlang.

IOC, HPCL, BPCL, GAIL, OIL leh, MRPL te chuan 2023-2024 fourth quarter-ah chuan Rs. 536,900 chawitir an nih hlawm thu an sawi a, ONGC erawh chuan Rs. 182,900 a chawi thung. IOC bakah, HPCL, BPCL Bakah, GAIL te chuan pawisa chawitir an nih chungchang sawi fiahna leh an thuneihna hnuaia engkim awm a nih loh thu hi an sawi tawh a ni. Heng company-te hi 2023-2024-a third quarter, October -December 2023 khan Rs. 5,42,800 chawitir an lo ni tawh bawk a ni.