Rajasthan-in OBC hnuaia Muslim reservation pek ennawn dawn

Rajasthan-a rorel lai, Bharatiya Janata Party (BJP) sorkar chuan Other Backward Classes (OBC) category hnuaia Muslim-te hnena hna zawnna leh zirna ina reservation siamsak chungchang chu an ennawn tur thu an puang.

Social justice and empowerment minister, Avinash Gehlot chuan kum 1997 - 2013 inkarah Congress-in Muslim pawl 14 hnenah OBC category hmanga quota a siamsak thu tarlangin, hei hi intih lawm tumna politics leh constitution kalh a nih thu a sawi a, a department leh Rajasthan sorkar chuan an ennawn leh vek dawn tih a sawi a ni. Gehlot hian hemi chungchangah hian complaint tam tak an dawn thu a sawi bawk a, hei vang hian Model Code of Conduct hlih a nih hunah a rang lama a ennawn tur committee din a, committee-in siam ṭha tura rawtna a neihte sorkar ngaihtuah tura theh luh a nih tur thu a sawi.

State sorkarin Muslim tana OBC quota hmanga reservation siam ennawn a tum chungchangah state minorities commission chairperson leh Congress MLA ni bawk, Rafiq Khan chuan,"Muslim zawng zawng tana reservation siam a nih chauhin sakhaw behchhana pek an ni a tih theih ang. Tun thilah erawh chuan a hnam anga an hnufual bik avang leh, dinhmun ṭha zawka dingte ruala ke pen ve mamawh Muslim hnam ṭhenkhat chauh pek an ni," tiin, socio-economic survey neih a nih hnua state OBC commission-in a tahtawl zela quota a pekte an nih thu a sawi thung. India Majlis-e-Ittehadul Muslimeen (AIMIM) state general secretary, Kashif Zuberi pawhin state BJP sorkar thil tum chu an tilui a nih chuan a party chuan an dodal tur thu tarlangin, BJP chu inthlan manifesto an neihte ennawna hma la zawk tur leh, Muslim-te beih nana hun hmang lo turin a ti ve bawk.

Rajasthan-ah hian sorkar hna leh zirna inahte reservation hi 62% siam a ni a, heta ṭanga OBC quota hi 21% a ni. OBC anga chhiar hnam leh pawl hi 82 an awm mek a, heng zingah hian Muslim mi; Meo, Kayamkhani, Bhishti, Manganiyar, Lakhera, Mirasi, Kathat, Bisayati, Sindhi, Gaddi, Julaha leh Qasai te an tel a ni.