Mihring hnute tui hralh lo turin FSSAI-in hriattirna chhuah

Food Safety and Standards Authority of India (FSSAI) chuan sorkar hriatpuina ni loa mihring hnute tui zuar leh hralh lo tura hriattirna a tichhuak a, mihring hnute tui sumdawn nana hman chu an danah pawh phalna a awm loh thu a tarlang.

FSSAI hian mihring hnute tui zawrh leh hralh a awm nia hriat chu titawp vek turin hriattirna a chhuah a, an hriattirna ngai pawimawh lo a, dan bawhchhe zawnga che lui an awm a nih chuan Food Business Operators (FBP)-in action an lak tur thu an tarlang zui a ni. Mihring hnute tui hi tun hnaiah online-a zawrh a ni a, milk bank anga dingin, nu hnute tui ngah leh hnetu tur nei lote'n hlawkna an neih theih nan an hralh ṭhin a ni. Milk bank hian mihring hrisel pangngaite hnute tui donate chu la khawmin, natna hrik leh bawlhhlawh awm thei te an endik hnuah dah khalin an khawl ṭhin. Milk bank tam tak, sorkar damdawi ina awm nghal angte hi chuan a thlawnin hnute tui hi an pe chhuak ṭhin a ni.