Delhi-a naupang damdawi in kangah nausen pasarih an thi

Vivek Vihar, Delhi-a naupang damdawi in kang avangin nausen pasarih an thi a, nausen panga chu damdawi-in dangah dah an ni.

Delhi Fire Service (DFS) hotu, Atul Garg chuan naupang damdawi in; Baby care new born hospital-a kangmei chhuakah hian nausen 12 an chhanchhuah hman thu leh nausen pasarih erawh chhan hman lohin an thi niin a sawi. Atul Garg hian kangmei chhuah chhan chu oxygen bur puak vang a nih thu sawiin, kangmei hi chak takin a darh nghal a ni, a ti. Delhi police senior officer chuan nausen thite ruang hi GTB hospital-a an dah thu sawiin, damdawi in neitu, Naveen Kichi chu an chhui zui nghal thu a puang ve bawk.

Delhi health minister, Saurabh Bharadwaj chuan thil thleng chu lungchhiatthlak a tih thu sawiin, kangmei chhuah chhan chhui nghal a nih thu te, pawikhawihtu hrem an nih ngei tur thu leh, tu emaw inthlahdah avanga thil thleng a nih chuan a mawhphurtu chu na taka hrem ngei a nih tur thu a sawi.