'Sorkar tharah UCC leh One Nation, One Election hman a ni ang' - Amit Shah

Union home minister Amit Shah chuan BJP-in sorkarna an siam leh a nih chuan, kum nga chhungin Uniform Civil Code (UCC) leh 'One Nation, One Election' hman a nih tawh tur thu a sawi.

Press Trust of India (PTI)-in interview an neihnaah Amit Shah chuan he thu hi sawiin, a nghawng tur zawng zawngte nena uluk taka zir chiang chungin term tharah chuan UCC hman ngei an tum thu a sawi. Inthlan a awm leh hunah a rual tlanga inthlan a nih theih nan 'One Nation, One Election' chu BJP sorkar chuan kalpui ngei an tum tih a sawi tel bawk. Amit Shah hian a rual tlanga inthlanna neih chuan inthlan buaipuina atana sum senso pawh a titlem thei dawn a ni, a ti.

Union Minister Shah hian UCC chu India-in zalenna a neih tirh aṭanga kan ram hruaitute leh danin kan mawhphurhnaa a dah a nih thu sawiin,"UCC hi kum 1950 aṭang tawha BJP thupui ber a ni a, tun hnaiah BJP sorkarna, Uttarakhand-ah hman ṭan a ni tawh. UCC hi sakhua, khawtlang leh dan chungchang khawih thil pawimawh tak mai a ni a, Uttarakhand sorkarin a hman pawh hi uluk zawka endik a ṭha, sakhaw hruaitute pawh rawn tel tur a ni. Uttarakhand aṭang hian inzir ila, siam ṭhat ngai lai siam ṭhain, Parliament pawhin dan anga a pawm vat a ṭul a ni," a ti. 'One Nation, One Election' chungchangah pawh Amit Shah hian ram puma a hun inang tlanga inthlan chu a ṭul thu sawiin,"Prime Minister pawhin zir chianna nei turin Ram Nath Kovind committee a din tawh a, report pawh an theh lut tawh. BJP hian sorkarna a siam leh a nih chuan kum nga chhunga kan tihhlawhtlin tur zingah kan dah a ni," tiin a sawi.