Kejriwal-a'n a bail hun chhung SC-ah pawhsei a dil

Delhi chief minister leh AAP hruaitu, Arvind Kejriwal chuan Thawhṭanni khan Supreme Court-in bail-a a chhuahna chu ni sarih chhung pawhsei a dil. Kejriwal hi Delhi excise policy thubuaia pawisa chheprelha puh a nih avangin March 21, 2024 khan man a ni.

Man a nih hnuah Kejriwal hi Tihar jail-ah hun eng emaw chen dah a ni a, a chungthu leh man a nihna a khinnate ṭum eng emaw zat ngaihtuah a nih hnuah May 10 khan Supreme Court chuan Lok Sabha inthlan campaign atan hun pein bail-in a chhuah a ni. Kejriwal-a bail hi inthlan zawh tuk, June 1-ah a tawp dawn a, SC chuan June 2-ah hian thuneitute hnena amah inpe turin a hriattir a ni. Hetih lai hian Kejriwal chuan May 27 khan Supreme Court-ah hian dilna theh lutin, a hriselna dinhmun endik tura test hrang hrang tih a ngaih thu tarlangin, PET-CT Scan te pawh tih a tum niin a tarlang.

Supreme Court hian Arvind Kejriwal hi bail-a a chhuah chhung hian, chief minister office emaw, Delhi secretariat te tlawh a phalsak lo a, official file engah mah signature a pek pawh a phalsak lo a ni. SC-in bail-a a chhuahnaah hian Delhi excise policy thubuai kal mek kaihhnawih engmah a sawi phalsak a ni lo bawk.