Cyclone Remal vangin West Bengal-ah mi nuai khat sawn chhuak

Cyclone Remal chu Pathianni khan West Bengal-a Sagar Island leh Bangladesh-a Khepupara inkarah tlehin, nimin thleng khan West Bengal tuipui kam velah hian thli leh ruah nasa tak a la thawk chhunzawm a ni. Thuneitute chuan cyclone avanga chhiatna nasa zawk pumpelh a nih theih nan mipui nuai khat chuang an sawn chhuak tawh.

West Bengal thuneitute chuan hmun hniam lai leh tuipui kam khaw ṭhenkhat - South 24 Parganas, North 24 Parganas leh Purba Medinipur-a mipuite chu thli leh ruah laka an him theih nan an sawn chhuak vek a ni. Mipui sawn chhuah an nih bakah hian thlawhtheihna thlawh dan, rel tlan dan leh kawngpuia motor tlan dan thlengin cyclone hian a tibuai niin an tarlang. Cyclone Remal thawk tur avang hian India Meteorological Department (IMD) chuan West Bengal tan hian red alert a lo tichhuak tawh a, prime minister Narendra Modi pawhin cyclone thawk tur avanga inbuatsaihna enlawkna neiin meeting a lo nei tawh bawk.

Cyclone Remal avang hian khawchhak lam leh chhim chhak lama rel tlante chu Pathianni leh Thawhṭanni khan cancel a ni a, Netaji Subhas Chandra Bose International Airport pawhin Pathianni chawhnu aṭang khan darkar 21 chhung thlawhtheihna thlawh chhuah a phal lo bawk. IMD chuan cyclone Remal hian darkar khata mel 110-120 a chak thli a keng tel niin an sawi.