Sorkar laipuiin Chief of Army Staff term pawtsei

Sorkar laipui hnuaia Appointments Committee of Cabinet chuan May 31, 2024-a chhuak tawh tur, Chief of Army Staff (COAS) General Manoj Pande term chu thla khatin a pawtsei. COAS term hi kum 62 an tlin emaw, kum thum service emaw, a tling hmasa zawk rin tur a ni.

Appointments Committee of Cabinet chuan May 26 khan General Manoj Pande term pawhseina tur hi an pawm a ni. Defence ministry thuchhuaha tarlan a nih danin, General Manoj Pande hi May 31, 2024-a chhuak tawh tur a ni a, mahse, Army rules 1954, rule 16A(4) ṭanchhanin ṭum danga tih ṭhin dan ni lo mah se, a term chelh tur aia rei chelhin, June 30, 2024 thleng a pawtsei a ni. COAS hi seniority hmanga chelh chhoh zel a ni a, General Manoj Pande a chhuah hunah hian Vice Chief of Army Staff, Lt. General Upendra Dwivedi chu COAS tur a ni a, ani dawtah hian Lt. General Ajay Kumar Singh a awm ve leh bawk ang.

COAS term pawhsei hi tun hmain ṭum khat chauh a la thleng a, kum 1975-a Indira Gandhi kaihhruai sorkarah khan a hun laia General G.G. Bewoor chu kum khat chhung a term pawhsei a lo ni tawh a ni. G.G. Bewoor term pawhsei a nih avang hian a dawta COAS tur, Lt. General Prem Bhagat chu COAS ni loin a term a tawp a ni.