Kejriwal-a bail pawhsei dilna SC vacation bench-in a hnawl

Delhi chief minister, Arvind Kejriwal-a'n a hriselna dinhmun endik tura bail-a chhuah a nihna pawhsei a dilna chu Supreme Court vacation bench chuan a hnawl.

Arvind Kejriwal hi Lok Sabha inthlan campaign avangin bail-a chhuah mek a ni a, June 2-a thuneitute hnena inpe leh tura hriattir a ni. Hetih lai hian Kejriwal hian a bail hun chhung hi Supreme Court-ah ni sariha pawhsei a dil a, hei hi Supreme Court vacation bench chuan a hnawl a ni.

Justice J.K Maheshwari leh Justice K.V Viswanathan te ṭhut vacation bench hian Kejriwal-a bail pawhsei dilna hi ngaihtuahin, bail pawhsei chungchanga thutlukna chu Chief Justice of India (CJI) siam tur a nih thu an sawi. Vacation bench hian Kejriwal-a aiawha ding, ukil senior, Abhishek Singhvi chu eng vanga Kejriwal-a bail a nih hmaa a hriselna endik ngai a nih thu sawi lang lo nge a nih zawtin, dilna chu CJI ngaihtuah tura an dah thu an tarlang.

Justice Khanna leh Justice Datta te ṭhut Supreme Court bench chuan May 10 khan Kejriwal hi bail-in an chhuah a, hei vang hian vacation bench chuan bail lo pawhseisak chu an thu a nih loh thu an sawi tel bawk. Kejriwal hian bail pawhsei a dilnaah hian a rihna tlahniam thut te, kal ṭha lo lan chhuah dan anga a taksa a awm thute tarlangin, June 3 aṭanga June 9 inkar hi test chi hrang hrang tih nan leh, a hriselna dinhmun hriat nan bail pawhsei hi a dil a ni.