Naxal vauna avangin Padma Shri pe let dawn

India khua leh tui chawimawina sang ber palina, Padma Shri dawngtu, Chhattisgarh mi, Hemchand Manjhi chuan Naxal hel hnen aṭanga vauna a dawn avangin a Padma Shri dawn tawh chu a pe let dawn tih a sawi.

Hemchand Manjhi hian thla hmasa lawk khan hmanlai damdawi siam thiamna a la hman ṭangkai chhunzawm avangin President Droupadi Murmu hnen aṭangin Padma Shri chawimawina hi a dawng a ni. Manjhi hi Chhattisgarh Narayanpur district-a khawsa a ni a, a chhungte nena an ngaihtuah hnuah he thutlukna hi a siam ta nia sawiin,"Padma Shri hi ka pe let dawn a, Maoist-te hian chawimawina ka dawng hi an sawisel a ni. He chawimawina hi ka phût emaw sawi chhuah a ni lo a, natna hrang hrang enkawl nana damdawi ka siam ṭhin avanga dawng ka ni. Naxal-te hian ka tupa Komal Manjhi chu dawta puhin an that tawh a, hei vang hian kan chhungkuaah chuan helpawl hlauhna hian thla a zar a ni," a ti.

May 26 khan Naxal helpawl chuan Chameli leh Gaurdand khuaa mobile tower siam mek pahnih halin banner-te an tar chhuak a, Manjhi vauna thu an theh darh chhunzawm bawk a ni. Hei vang hian Manjhi chuan Padma Shri a lo dawn tawh pawh chu pek let a tum niin a sawi a, a damdawi siam ṭhin pawh chu a bansan tur thu a puang zui bawk. Naxal helpawlin pamphlet an theh darhah hian Dr. Manjhi-a'n Padma Shri a dawng lai thlalak pawh a chuang tel a ni. Naxal-te hian Manjhi Narayanpur district chhung, Chhotedongar-a Aamdai Ghati iron ore project-ah hlawkna neiin Jayaswal Neco Industries Limited-te a pui niin an puh a, Manjhi erawh chuan he puhna hi tun hma aṭangin a lo pha tawh a ni.