Inthlan zawh niah INDIA party-te inhmu khawm dawn

Lok Sabha inthlan 2024-a BJP sorkar paihthlak tuma eptu party ṭangrual pawl, Indian National Developmental, Inclusive Alliance (INDIA) chuan Lok Sabha inthlan zawh ni, June 1-ah inthlan thlir letna neia inhmuh khawm an tum thu an puang. Inhmuh khawm hi Congress president, Mallikarjun Kharge chuan a ko a ni.

"Inhmuh khawm kan rawt hi formal taka inhmuh khawm a ni dawn lo. Inthlan lai khan kan inhmu khawm lo a, phone aṭangin ruahmanna kan siam tawp a ni. Mite beisei aia ṭhain inthlanah kan che a, ram pum huap pawhin kan che ṭha a ni. Inhmuh khawmah hian inthlana kan chet dan thlir letna leh, kan kal zel dan tur ruahmanna siam a ni ang," tiin Congress hruaitute chuan an sawi. Lok Sabha inthlan leh campaign chungchanga hma la tura INDIA-in an din, committee leh sub-committee hrang hrangte chuan inthlan neih chhung khan eng hna mah an thawk thei lo a, mahse, INDIA-a tel party zawng zawngte chuan ṭha takin an thawkho thei nia hriain, Lok Sabha seat tamna ber, Uttar Pradesh-ah pawh an che ṭha niin an insawi.

INDIA-in June 1-a inhmuh khawm an tum thu an puan hnu hian West Bengal-a an thawhpui, Trinamool Congress chuan hemi ni hian an state-a seat pakuaah inthlan an hmachhawn dawn avangin an tel theih loh tur thu an sawi thung.