Prime Minister-in Property Cards Scheme hawng

Prime minister Narendra Modi chuan nimin chawhma lam khan video conferen­cing hmangin, SVAMITVA (Survey of Villages And Mapping With Improvised Tech­nology In Village Areas) scheme hnuai­ah Property Cards Scheme chu a hawng. 

Property Cards Scheme hi thingtlang khuate tihhmasawnna tur a nih thu Modi chuan a sawi. Thingtlang miten an property (in leh lo) hmanga loan an lak theihna tur leh hamṭhatna an hmuh theihna tura tih a ni a, an property chu an sum lu a ni tih hriattir a, an hman thiam theih nana tih a ni. 

SVAMITVA scheme hi thingtlang khua ten sum leh paia ngialnghehna an neih theih nan tih a ni a, he scheme kaltlang hian land record siam a ni dawn a, thingtlang khaw thawm ṭhatna (rural planning) atana pawimawh tak a ni. Heng bakah hian Gram Panchayat-in GIS map a siam ṭhin chu a pui thei tawh dawn a, ram inchuh chungchanga harsatna awm ṭhin pawh a sut kian phah rin a ni bawk. 

Prime Minister's Office (PMO) tarlan danin he card hi property holder mi nuai khat vel ten an mobile phone-a SMS link hmangin an download thei dawn a ni. Hei bakah hian state sorkarte chuan property card hi an pechhuak bawk ang.

Property card hi Uttar Pradesh, Haryana, Maharashtra, Madhya Pradesh, Karnataka leh Uttarakhand-ah te sem chhuah hmasak a ni dawn a, thingtlang khua (village) 763-ten hlawkna an nei ang. Uttar Pradesh-a thingtlang khua 346, Madhya Pradesh-a thingtlang khua 44, Maharashtra (100), Haryana (221), Uttarakhand (50) leh Karnataka-a thingtlang khua 2-ten hlawkna an nei dawn a ni.