CBI kutah Hathras pawngsual thubuai hlan

Hathras, Uttar Pradesh-a Dalit hmeichhe pakhat pawngsual rawn leh thah thubuai chu Inrinni khan Uttar Pradesh police-te kut aṭangin Central Bureau of Investigation (CBI) kutah hlan a ni. 

State police-ten he thubuai an chhui dan chungchangah sawiselna nasa tak a awm a, chief minister Yogi Adityanath kaihhruai BJP sorkar paw'n kar liam ta khan thubuai chhui hna hi CBI kuta pek a lo rawt tawh bawk. 

Police-te chuan forensic report aṭangin pawngsual a ni ngei tih finfiahna a awm lo niin an sawi a, mahse hei hi expert-te chuan hnialin, pawngsual a nih aṭanga ni 11 hnuah chauh police-te hian sample an la a ni, an ti. Home Ministry chuan mipat hmeichhiat lam hawia pawikhawihna thleng chungchangah complaint/report thehluh aṭanga darkar 24 chhungin medical examination neih a ni tur a ni tiin a sawi. Police-te chu thubuai an chhui kawngah che muang lutuk leh,  BJP sorkar pawh pawikhawihtu, upper caste Thakur-te thil tihsual thupbo sak tumah puh a ni bawk. 

Hemi chungchangah hian police-te chuan FIR 19 an thehlut a, mahse pawikhawihtu bera puh lakah FIR an thehlut tel lo. FIR hi sorkar hming tihchhiat tuma puhte lakah an thehlut thung. 

CBI chuan thubuai an kuta hlan a nih tuk, nimin khan Ghaziabad police station-ah pawngsual leh tualthah tuma puhna chungchangah FIR an thehlut nghal.