Intihhmingchhiat thubuaiah court-in AAP hruaitu Atishi ko

Delhi chief Metropolitan magistrate Tanya Bamniyal chuan Aam Admi Party (AAP) hruaitu leh Delhi cabinet minister ni bawk, Atishi Marlena chu intihhmingchhiat thubuaiah June 29,2024-a Rouse Avenue court-a inlan turin a ko.

Atishi lakah hian BJP hruaitu, Praveen Shankar Kapoor chuan thla hmasa khan intihhmingchhiatna thubuai hi a theh lut a, Kapoor hian Atishi bakah Delhi chief minister, Arvind Kejriwal-a lakah pawh thubuai hi a theh lut bawk a ni. PraveenKapoor hian Atishi leh Kejriwal-te chu BJP-in pawisa hmanga thlem anga thu an sawi avangin BJP an tihmingchhia niin court-ah hian a sawi a, hei vang hian court chuan Atishi hi inlan tura koin, Kejriwal erawh koh a ni ve lo thung.

Praveen Shankar Kapoor-a'n court-a intihmingchhiatna thubuai a theh luhah hian January 27-ah Arvind Kejriwal-a'n social media-a BJP-in AAP MLA pasarih Rs. vbc. 25 hmanga an thlem thu a tarlang nia sawiin, AAP hian hemi chungchanga an ṭanchhan tichiang tur hian eng fiahna mah an nei lo niin a sawi bawk. Kapoor hian April 2-a Atishi-i'n press mite hmaa BJP-in an thlem thu a sawite chu a tarlang bawk. Atishi hian a hnaihvai tak mi pakhat kaltlangin BJP hian an biak thu leh, a political career chhanhimna atana BJP zawm tura an sawm thu te, a zawm duh lo a nih chuan Enforcement Directorate-in an man tur thuin an vau tih te a sawi a ni.

Kapoor hian court hnenah hian Atishi leh Kejriwal te chuan an thusawi chu hnuk let a, TV leh social media kaltlanga ngaihdam dilna siam tura a duh thu a sawi lang bawk.