Mullaperiyar-a tuikhuah siam tum avangin TN-a loneitute an nuar

Tamil Nadu-a loneitu pawl hrang hrangte chu Madurai-a Tallakulam head post office kawtah pung khawmin, Kerala sorkarin Mullaperiyar-a tuikhuah siam a tum dodalna an lantir.

Mullaperiyar-a tuikhuah siam tum dodalnaah hian loneitute chu Madurai-a income tax office-ah luh an tum a, police-te'n an lo dang a ni. Hemi hnu hian Kerala sorkarin tuikhuah siam tura thuchhuah a siamna lehkha copy an hal zui bawk.

Loneitute hian Union Ministry of Environment and Forests hnenah tuikhuah siam phalna chu pe lo turin an ngen bawk a, Kerala sorkar chuan Supreme Court thurawn kal pelin, tuikhuah awm sa chu him tawk loah a ngai lui a ni, an ti. Hei vang hian loneitute hian Tamil Nadu sorkar hnenah Kerala sorkar laka court zah lohna thubuai ziak lut tura an duh thu an sawi a, Tamil Nadu sorkar chu Mullaperiyar-a tui san zawng chu feet 152 tala tisang tura hma la turin an ngen bawk a ni.

Madurai-a loneitu pung khawmte hian sorkar laipui chu Kerala sorkarin hma a lak chhunzawm mai loh nan tuikhuah awmna hmuna Central Reserve Police Force (CRPF) dah lut turin an phût. Loneitu pawl hotu, PR Pandian chuan tuikhuah thar siam tum chu chumi luia innghata eizawng loneitu tam zawkte tan chhiatna thlentu a nih tur thu leh, Kerala sorkar chuan a thuchhuah chu a sût lo a nih chuan an lungawi lohna chu a ṭul chen chen kalpui an inhuam thu a sawi. Tuikhuah tur dodala lungawi lohna lantir zingah hian Cumbum Valley Farmers’ Association leh Mullai Periyar Vaigai Irrigation Farmers’ Association te pawh an tel.