ECI-in Odisha CM special secretary suspend

Election Commission of India (ECI) chuan Odisha chief minister Naveen Patnaik-a special secretary, DS Kuttey chu Odisha-a Lok Sabha inthlanah thil dik lo tihnaa a inhnamhnawih avangin a suspend.

DS Kuttey hi Odisha-a eptu party, Bharatiya Janata Party (BJP) chuan Biju Janata Dal tana inthlannaa cheah an puh a ni.

ECI thuchhuahah chuan Kuttey hi Odisha-a inthlanah midang rilru hruai kawi zawngin a che nia sawiin, hei hi service rule bawhchhiatna a nih thu leh, New Delhi-a a headquarters-ah May 29, 2024 ral hmaa in-report turin an hriattir a ni. ECI chuan Kuttey puhna chu inthlanna hmuna thu hretu hrang hrang hnen aṭanga thu an dawn dan a nih thu tarlangin, Odisha chief electoral officer chu service rule bawhchhiatna kaihhnawiha thuneitute hnena Kuttey laka charge sheet theh luh a nih theih nan, May 30 tlai dar 5 aia tlai loa chief secretary hnena draft charge sheet theh lut turin an hriattir bawk.

Kuttey bakah hian IPS officer tho; Inspector General of Police, Ashish Kumar Singh (CM Security) chu ECI hian inthlan kaihhnawiha thil dik lo tia puh bawkin, May 30, 2024 aia tlai loa AIIMS Bhubabeshwar-a medical examination nei ṭha turin a hriattir bawk. ECI chuan heng IPS officer pahnihte hi official thila Odisha CM chet chhuah ṭhinnaa ruahmanna siamtu an ni a, inthlanaa mipui rilru hruai kawi zawnga hma la niin a sawi a ni.