India-in Papua New Guinea ṭanpui nan Rs. mtd. 1 a pe

Sorkar laipui chuan tuilian leh leimin nasa tak avanga chhiatna thlenna, Papua New Guinea ram ṭanpuina leh chhawmdawlna atan Rs. 1,000,000 khat a pe.

Ministry of External Affairs (MEA)-in thuchhuah siamin,"Forum for India-Pacific Islands Cooperation (FIPIC) kaltlanga ṭhian ṭha leh thawhpui duhawm tak an nih angin leh, Papua New Guinea mipui ngainatawm em emte laka ṭhat kan chhuahna ni pah fawmin, India sorkar chuan an chhiat tawh avanga ṭanpuina, an intuam hlawmna leh bul an ṭan ṭhat leh theih nan Rs. mtd. khat hi a pe a ni" tiin an tarlang. Papua New Guinea-in chhiat an tawh chungchangah hian prime minister Narendra Modi pawhin a tawrhpuina leh ṭanpui tura India inhuam thu a lo sawi lang tawh a ni.

Papua New Guinea-ah hian May 24 khan leiminin mi 2,000 dawn a chhilh nia hriat a ni a, chhanchhuah hna thawh mek zel a ni bawk. India hian kum 2018-a Papua New Guinea ramin lirnghing vanga chhiatna a tawh leh, 2023-ah tlang kang nasa tak a tawrh ṭum pawh khan a lo pui tawh bawk.