J&K-ah firfiak pali that

Inrinni liam ta khan Jammu and Kashmir-a Kulgam leh Pulwama district-a security force-te'n a hrana beihpui an thlaknaah firfiak pali an that.

Police-te sawi dan chuan security force-te chuan Zirtawpni zan aṭang khan an thudawn bawhzuiin Kashmir chhim lama awm Kulgam district-a Chingam area-a firfiak awmte zawn beihpui thlakin helai hmun hi an hual a, hetah hian firfiakte chuan security force-te hi lo kapin anni hian an kap let ve nghal a, firfiak pahnih an kap hlum a ni.

Kulgam district-a an mi kahhlumte hi tute nge an nih pawh hre tawhin Pakistan mi ve ve an ni a, pakhat zawk hi chu Punjab Pakistan mi a nih thu tarlangin an pahnih hian  "A" category terrorist an nih thu an tarlang. Heng mi pahnihte hi Jaish-e-Mohammad firfiak pawl mi ve ve an nih thu an tarlang bawk.

Police record aṭanga a lan dan chuan heng firfiak pahnihte hi pawikhawihna eng emaw zatah an inhnahnawih a, Furah Mirbazzar-a police official Khursid Ahmad thahnaah te, Akhran Mirbazzar-a sarpanch Aarif Ahmad beihnaahte pawh khan an tel niin an sawi. 

Army official-te chuan M4 rifle leh pistol an man tel thu an sawi a ni.

Kashmir chhim lama awm tho,  Pulwama district-a Dadoora area-a security force-te'n beihpui an thlaknaah pawh firfiak pahnih kahhlum a ni bawk tih police-te chuan an sawi a ni.