Republic TV chief executive thu zawhfiah turin ko

Mumbai police-a Crime Branch chuan Republic TV chief executive, Vikas Khanchandani chu dik lo taka television rating  siam chungchangah thu zawhfiah turin nimin khan an ko. 

Hlawkna hmuh theihna tura TV rating dik lo siam chungchangah hian mi pali man an ni tawh a, TV channel pahnih Fakt Marathi leh Box Cinema neitute pawh an tel. Inrinni khan Republic TV CFO Subramaniyam Sundaram chu thu zawhfiah tura koh a lo ni tawh bawk. 

Republic TV hian news channel zingah Television Rating Points (TRP) sang ber niin a inchhal a, actor Sushant Singh Rajput thihna chungchang an cover avangin leh, police-te sawiselna lam hawi zawhnate an tihchhuah avangin bitum an ni ta bik niin an sawi. 

Hetih lai hian Mumbai police hotu chief Parambir Singh chuan channel pathumte chuan advertising rate sang tak an lak theihna turin ratings tihsanna turin dik lo takin thil an ti niin a sawi thung. Rating meters dahtu agency, Hansa chuan chhungkhaw 20,000 velte TV en dan a zirchiannaah, an zinga eng emaw zat chuan an channel bik en tura thamna pek niin, heng chhungkuate hian thla khatah Rs 400 - 500 an dawng ṭhin a ni, a ti. 

English ṭawng ṭhiam lo, chhungkaw rethei takten English news channel an en reng danah dik lo taka data tihdanglam tumna a awm tih a lang chiang hle a ni, a ti.