NEET sawnhlat chhan sawifiah turin sorkar phut

President Pranab Mukherjee chuan medical leh dental course zir tum, zirlaite tana common entrance test, National Eligibility cum Entrance Test (NEET) buatsaih tum kum khata tihkhawtlai a nih chungchang sawifiah turin sorkar laipui a phut.

India rampuma medical leh dental course zir tumte tana common exam buatsaih tum hi state hrang hrang te chuan nasa takin an sawisel a, kar kalta Zirtawpni khan cabinet meeting chuan exam tur chungchanga Supreme Court thupek chu kum khat atan a sawnhla ta a ni. Mahse he exam hi management quota-a central sorakar leh private management institution-a zir tumte tan chuan hman a ni tho ang.

President chuan NEET sawnhlat tur chung≠changah sorkar laipui chu aordinance emaw, special order emaw a tihchhuah hmaa sawifiah turin a hrilh. Health Ministr JP Nadda chu amah hmu a, sorkar laipuiin Supreme Court thutlukna siam a pawmpui tawh hnuah thu dang a neih leh chhan sawifiah turin a ti a ni. President hian hemi chungchang hi legal expert-te pawh a zawtfiah nia sawi a ni bawk.

NDTV-in a kawmnaah, Health Minister JP Nadda chuan Supreme Court thupek chung≠changah buaina a awm lo tih a sawi a, state sorkarte chuan thil chi thumah harsatna an nei a, an state-a exam kalpui mek a nih chungchang te, syllabus leh regional language chungchangahte harsatna an nei tih sawiin hei hi all-party meet ah pawh sawiho a ni, a ti. May 1 khan NEET exam, thawh khatna hi neih a ni tawh a, July 24-a exam thawh hnihna neih leh tur pawh ruahman lawk anga kalpui a ni dawn tih Nadda chuan a sawi. Exam thawh khatnaah hian zirlai nuai 6.5 chuang an inlan a ni.