CBI hmaah Rawat a inlan dawn

Central Bureau of Investigation (CBI) chuan nimin khan Utrarakhand Chief Minister Harish Rawat chu agency hmaah May 24-a inlan turin a hrilh.

Harish Rawat hian a kaih≠hruai sorkar laka hel, Congress MLA 9-te chu Uttarakhand Assembly-a sorkar fiahna neih hun≠ah amah thlawp tura thlemin, thamna pek a tum nia puh a ni. Thamna pek a tum lai nia sawi, sting operation video pawh hi thehdarh a ni. Hemi chung≠changah hian April 29 khan CBI chuan Preliminary Enquiry (PE) a lo ziak lut tawh a ni.

CBI hian May 9 khan dik lo taka thiltih tum nia puh chung≠changah Rawat hi inlan turin alo ko tawh a, mahse Rawat hian hun pek belh turin a ngen a ni. Hemi hnu hian assembly-ah Rawat-a kaihhruai sorkar hian fiahna paltlangin, thuneihna a chang leh ta a ni.

Kar hmasa khan Uttarakhand sorkar chuan thamna inpek tum nia sawi chungchangah thubuai ziahluh chu sut a nih thu a ti≠chhuak a, mahse hei hi CBI lam chuan a pawm lo. CBI chuan he thil thleng chungchang hi a chhui zui zel dawn tih a sawi. He thubuai hi Uttarakhand-a President's Rule puan a nih khan CBI kutah hian hlan a ni a, mahse Rawat-a kaihhruai sorkar a din leh hnuah hriattirna tihchhuah tawh chu a sut ta a ni.

Rawat chuan an puhna hi thu dik lo a nih thu sawiin, video thehdarh pawh a lem a nih thu a sawi a, mahse a hnuah video-ah chuan a lang ngei tih a sawi leh.

Assembly-a Rawat-an fiahna a paltlang hnuah, May 15 khan state cabinet chuan CBI hnenah sting operation chungchang chhui tir rawtna chu sutin, state subject a nih vangin hemi chung≠chang chhui tur hian Special Investigatin Team din a rel ta zawk a ni.