Vande Mataram chham thei lo chuan India rama awm turin dikna nei lo : Union minister

Union Minister of State for Ministry of Micro, Small and Medium Enterprises (MSME) Pratap Chandra Sarangi chuan Surat, Gujarat-a thu a sawinaah, 'Mi tupawh, Vande Mataram chham thei lo leh pawm theih lo chu India rama awm turin dikna a nei lo a ni," a ti. 

Union minister chuan Citizenship (Amendment) Act (CAA) Congress party-in 'Partition' chungchanga thil an lo tihsual tawhte silfaina tur a ni tiin, kum 70 liamtaa lo pass daih tawh tur a ni, a ti bawk. "CAA hi kum 70 liam ta daih khan lo siam tawh tur a ni. Kan thlahtute  thil lo tihsual siamṭhatna tur a ni. Hei vang hian prime minister Narendra Modi pawh kan lawmpui a ngai a ni. Congress-in thil a tisual a, keiniin kan lo siamṭha thung a ni," tiin a sawi. 

CAA chungchangah Congress party chu thu dik tawk lo thehdarh a, ramchhungah buaina thlenah a puh. "Ramchhung boruak tichhetute chu ram hmangaihtu an ni lo. India zalenna, pumkhatna leh Vande Mataram pawm lotute chu India rama awm turin dikna an nei lo a, an theihna hmun hmunah an kal  mai tur a ni," a ti. 

India ram economy chungchang pawh sawiin, minister chuan khawfingchat hmaa khawthim zual lai a thleng ang kha India chuan a tawng mek a ni, a ti. Tuna kan dinhmun tawn mek siamṭhatna tur hian India pawisa note-ah Goddess Laxmi thlalak dah a rawt bawk.