Tamil Nadu CM atan Jaya-i la lut Zu dawr 500 kharna thupek a tichhuak nghal

Tamil Nadu Chief Minister atan nimin khan AIADMK hotu, J Jayalalithaa-i chu rinawmna thu tiam tira lakluh a ni a, CM term a zawna a chelhna tur a ni.

Chief Minister thar lakluh inkhawm hi Chennai-a Madras University Centenary Auditorium-ah neih a ni a, mipui tel an ṭhahnem hle. Governor K Rosaiah chuan CM atan Jaya-i hi rinawmna thu tiam tirin a la lut a, hemi hnu hian minister tur mi 28-te chu lakluh zui an ni bawk. Minister atana lakluh zingah hian mi thar 13 an tel. Cabinet minister zingah hian hmeichhia pali an tel a ni.

Lakluh inkhawmah hian eptu pawl, DMK hruaitu Karunanidhi a tel lo a, mahse a fapa MK Stalin a tel. Sorkar laipui lam aiawhin union parliamentary minister M Venkaiah Naidu a tel bawk.

CM atana lakluh a nih hnuah, nimin vek khan Jaya-i hian an state-a zu dawr 500 kharna tur thupek a tichhuak nghal a, hei bakah hian zu dawr inhawn theih hun chu darkar hnihin a titlem nghal bawk a ni.

Zu dawr khar turte hi state sorkar hnuaia Tamil Nadu State Marketing Corporation (Tasmac) enkawl a ni a, anni hian wholesale and retail-in zu hi an pechhuak ṭhin. Tasmac zu dawr hawn theih hun pawh hi a hmaa 10 am - 10 pm ni ṭhin kha, nimin aṭangin 12 noon - 10 pm ah bithliah sak an ni bawk.

Jaya-a party, AIADMK hian inthlan dawna an party manifesto-ah khan an state-ah a tahtawla zu khap a lo tiam tawh a ni. Hei bakah hian manifesto-a an lo tarlan tawh, welfare scheme panga chu a taka hman nghalna turin CM chuan thupek a tichhuak nghal bawk.

Welfare scheme panga hman nghal tur zingah hian a thlawna chhungkaw tin hnenah power unit 100 a thlawna pek te, loneitute loan ba ngaihdamna tur te, hmeichhe pasal nei turte hnenah a thlawna rangkachak gram riat pekna turte a ni. Power unit 100 a thlawna pek a nih dawn vang hian state sorkar chuan kumtin cheng vaibelchhe 1,607 a seng dawn a ni.

Tamil Nadu assembly inthlan neihah khan AIADMK hi thlan tlin an ni a, assembly seat 234 awmah seat 134 an la a ni.