Delhi-ah eirukna a tlahniam : Arvind Kejriwal

Delhi Chief Minister Arvind Kejirwal-a chuan an party, Aam Aadmi Party (AAP) in sorkarna an siam hnuah Delhi-ah eirukna a tlahniam nasa hle tih a sawi.

Pathianni-a AAP in public meeting buatsaihah he thu hi sawiin, Kejriwal-a chuan, "Delhi-a eirukna hi a tlahniam nasa hle. Za-ah zain a bo tawh tih chu ka sawi lo a, mahse 70%-80% velin eirukna hi a tlahniam tawh a ni" a ti. Eirukna umbo vek tura theihtawp chhuah zel an tum thu a sawi bawk.

Kejriwal-a chuan a kaihhruai sorkarin eirukna umbo tura a hmalakna chu Prime Minister Narendra Modi-a kaihhruai sorkar laipui chuan lo dan beh a tum a ni tih a sawi. "Sorkar laipui chuan eirukna tihbo a tum lo a, keiniin tihbo kan tum pawh a duh hek lo. Mahse an duh angin thil ti se la, eirukna umbo tuma kan beihna erawh kan chhunzawm zel dawn a ni" a ti.

Delhi CM chuan party lian pahnih, BJP leh Congress party inbeih dan chu nupa intithiam lo ang mai niin a tehkhin. "Nupa, thuruk zawng zawng inhriatsak a, intithiam lo ang mai an ni. BJP chuan Congress thuruk pawimawhte a hria a, hetiang bawk hian Congress pawhin BJP thurukte a hre bawk a ni. Defence Minister Manohar Parrikar chuan Goa-a Congress hruaitu pawimawh eng emaw zat file-te a nei ru a, mahse heng mite chunga action la chuang loin, vauna atan a hmang ṭhin tia min hrilhtu pawh an awm a ni" a ti.

AAP hruaitu chuan BJP leh Congress chu mipuite rawktu nia sawiin, heng party pahnih belhkhawm hi misual, mafia ang mai an nih thu a sawi bawk.