INDIA-in darkar 48 chhungin PM tur a thlang fel ang : Jairam Ramesh

Congress general secretary, Jairam Ramesh chuan Lok Sabha inthlan 2024-a INDIA-in hnehna a chang a nih chuan darkar 48 chhungin Prime Minister tur an thlan tur thu a sawi. Jairam Ramesh chuan party mala seat la hnem ber chu INDIA hruaitu tur an ni dawn niin a sawi bawk.

Jairam Ramesh hian Lok Sabha inthlan thawh sarihna campaign ni hnuhnung bera interview a neihnaah he thu hi sawiin, eptu party ṭangrual pawl; INDIA chuan Lok Sabha-a hnehna chang tura seat neih ngai zat, 272 chu an neih phak ngei tur thu leh, a aia tam daih an lak a beisei thu a sawi a ni. Ramesh chuan INDIA-in hnehna an chan hunah chuan BJP kaihhruai NDA-a party ṭhenkhat chuan rawn zawm an duh tur thu sawiin, INDIA zawm an phal dawn leh dawn loh chu Congress rorelna sang, Rahul Gandhi, Sonia Gandhi leh Mallikarjun Kharge te telnain an ngaihtuah dawn niin a tarlang.

PM tur thlan chungchangah hian INDIA-a Malikarjun Kharge, Sharad Pawar leh Mamata Banerjee te awm avang pawhin harsatna a awm thei dawn nia sawi chu Ramesh chuan INDIA au hla, 'keimahni ta ni lo, keimahni tan ni lo' tih chuan a kaihhruai tur thuin a chhang. Party tam tak pawl pakhata inzawm khawm chuan rorelnaah harsatna a thlen thei dawn nia sawi chu Ramesh chuan Dr. Manmohan Singh-a'n UPA sorkar kum 10 chhung a kaihhruai theih aṭangin thil a chiang tih a lan thuin a chhang bawk.