CAA hnuaiah Bengal, Uttarakhand leh Haryana-ah khua leh tui nihna pe

Union Ministry of Home Affairs (MHA) chuan Nilaini khan Citizenship Amendment Act, 2019 (CAA) hmangin West Bengal, Uttarakhand leh Haryana-a mi eng emaw zat hnenah India khua leh tui nih a pek thu a tarlang.

MHA hian heng state pathum aṭanga CAA hmanga India khua leh tui nihna an pek zat hi an tarlang lo a, mahse, West Bengal-a khua leh tui pek zingah hian Hindu pariat an tel nia hriat a ni. MHA chuan thuchhuah siamin,"CAA hmanga khua leh tui nihna pek chu West Bengal-ah pawh kalpui a ni ta. West Bengal-ah hian empowered committee chuan India khua leh tui nihna diltu hmasate chu certificate a pe chhuak tawh a ni," tiin, Uttarakhand leh Haryana-ah pawh empowered committee kaltlanga pek an nih thu a tarlang tel bawk.

March 11, 2024 khan MHA chuan ram puma CAA hman ṭan thu hi a puang a, May 15 khan Pakistan aṭanga India-a lo pem, Delhi-a cheng Hindu eng emaw zat hnenah khua leh tui nihna a lo pe tawh a ni. Tun dinhmunah CAA hmanga India khua leh tui nihna, online portal hmanga diltu hi 25,000 chuang an awm mek niin an tarlang bawk a ni.