Kejriwal-a bail pawhsei dilna SC registry-in ngaihtuah turin dah tel lo

Supreme Court registry chuan Delhi chief minister, Arvind Kejriwal-a'n Delhi excise policy thubuaia an man avanga bail pawhsei a dilna chu ngaihtuah tur zingah a dah duh lo.

SC Registry hian Arvind Kejriwal-a'n Enforcement Directorate (ED)-in Prevention of Money Laundering Act (PMLA) hmanga an manna hnuk let tura a khinna thubuai kal lai chu Supreme Court-in a ngaihtuah mek thu leh, ngaihtuah chhunzawm leh tura a dah tawh sa a nih thu a tarlang a ni. Registry chuan Supreme Court-in Lok Sabha inthlan campaign avanga bail-a a chhuah chauh thu leh, a duh a nih chuan PMLA, section 45 hmanga statutory bail dil turin vacation bench-in a kawhhmuh bawk thu an tarlang tel bawk.

Arvind Kejriwal-a bail pawhsei dilna hi Supreme court vacation bench chuan a ngaihtuah tawh a ni. Kejriwal-a ukil, Abhishek Singhvi chuan an dilna hi a rang lama ngaihtuah a duh thu tarlang mah se, SC vacation bench, Justice Sanjiv Khanna leh Dipankar Datta te ṭhut chuan Kejriwal-a dilna hi an ngaihtuah tur a nih loh thu sawiin a hnawl. Vacation bench thurawn ang hian Kejriwal chuan nimin vek khan bail pangngai hi court-ah a dil leh a, nimin khan a dilna hi ngaihtuah nghal niin, he thu ziah lai thleng hi chuan thu thar hriat a la ni lo.