Kanyakumari rock memorial-ah ni 2 chhung PM insawrbing dawn

Prime minister Narendra Modi chuan nimin aṭanga ṭanin Tamil Nadu, Kanyakumari-a rock memorial-ah ni hnih chhung insawrbingna (meditation) a nei ṭan. PM Modi hian kum 2019 Lok Sabha inthlan campaign tawp lamah khan Kedarnath cave-ah meditation hi a lo nei tawh bawk a ni.

Kanyakumari-a rock memorial hi Swami Vivekananda puala siam a ni a, Vivekananda rock memorial tiha hriat a ni bawk. PM Modi-a'n meditation a tih chhan hi Lok Sabha inthlan 2024 tawpna tur puala a tih niin BJP hruaitute chuan an sawi. PM Modi hian meditation hi May 30-ah Dhyan Mandapam-ah ṭanin June 1 thleng a nei dawn a ni. Meditation a neih hun chhung hian Sri Bhagavathy Amman temple-ah ṭawngṭaina hun a hman dawn bakah, June 1-a Kanyakumari a chhuahsan hmain Thiruvalluvar statue a tlawh dawn bawk niin BJP chuan an tarlang.

BJP hruaitute chuan PM Modi-a'n meditation neih nana Kanyakumari a thlan chhan chu India ram tana Vivekananda hmathlirte tihhlawhtlin tumna lantirna a nih thu sawiin, mimal ang pawha PM hian Swami Vivekananda chu a entawn ber a nih thu an sawi.

Hetih lai hian eptu party Congress chuan PM Modi chu Model Code of Conduct (MCC) bawhchhiaah puhin Election Commission of India (ECI) hnenah an thlen. Congress hruaitu, Abhishek Singhvi, Randeep Surjewala leh Naseer Hussain te chuan PM Modi chu inthlan zawh tawh hnu, June 1 hnu lama meditation nei tur emaw, meditation a neih chu chanchinbu mite hriata tlangzarh lo tura an duh thu an tarlang a ni. West Bengal chief minister, Mamata Banerjee pawhin PM Modi chuan meditation chu a kaltlangpui a nih chuan EC hnenah complaint a theh luh tur thu a sawi ve bawk.