Vawiinah Lok Sabha inthlan thawh sarihna leh a tawpna

Election Commission of India (ECI)-in Lok Sabha inthlan 2024 neih dan tura ruahmanna a siam angin, vawiin hian a thawh sarihna leh a tawpna atan state leh Union Territory pariat aṭanga constituency 57-ah vote thlak a ni ang.

Vawiina inthlang turte hi - West Bengal-ah constituency pakua, Uttar Pradesh-ah constituency 13, Punjab-ah constituency 13, Odisha constituency paruk, Jharkhand constituency pathum, Himachal Pradesh-ah constituency pali, Chandigarh constituency pakhat leh Bihar-a constituency pariat te an ni. West Bengal-ah hian candidate 124 an awm a, Uttar Pradesh-ah candidate 144, Punjab-ah candidate 328, Odisha-ah candidate 66, Jharkhand-ah candidate 52, Himachal Pradesh-ah candidate 37 Chandigarh-ah candidate 19 leh Bihar-ah candidate 134 an ni a, candidate zawng zawng hi 904 an ni. Candidate langsar tak tak zingah Varanasi aṭanga chuh tur Prime Minister Narendra Modi pawh a tel a ni.

Candidate 904 zingah hian thubuai nei 199 an awm a, an thubuaia thiam loh chantir 13, tualthah thubuai nei pali leh hmeichhe laka pawikhawihna thubuai nei candidate 13 an awm bawk a ni. Party anga lakin party lian zual zingah BJP candidate 51 aṭanga 23 chu thubuai nei an ni a, Congress candidate 31 zinga 12, AAP candidate 13 aṭanga panga, BSP candidate 56 zinga 13 leh SP candidate pasarihte chu thubuai nei an ni bawk.

Inthlan thawh sarihnaa chuh tur candidate zingah hian mi 299-te chu crorepati candidate an ni a, hei hi 33% a tling a ni. Candidate zinga hausa ber chu Punjab-a Bathinda-a ding tur, SAD candidate, Harsimrat Kaur Badal niin, a hausakna hi Rs. vbc.198 anga chhut a ni a, a rethei ber hi Odisha Jagatsinghpur-a ding tur, Utkal Samaj party mi, Bhanumati Das a ni thung.