Delhi-a damdawi in kang neitu leh doctor ni 14 hreng dawn

New Delhi metropolitan court chuan kar liam taa naupang damdawi in kang neitu leh, damdawi in a kan laia duty doctor pakhat chu ni 14 chhung hren an nih tur thu a a sawi.

Chief metropolitan magistrate, Vidhi Gupta Anand chuan Delhi chhak lam, Vivek Vihar-a naupang damdawi in; Baby Care New Born Child Hospital neitu, Dr. Naveen Khichi leh May 25-a damdawi in a kan laia duty, Dr. Aakash te chu ni 14 hren tur a nih thu Ningani khan a puang a ni. Damdawi in kang avang hian Vivek Vihar police station-ah Indian Penal Code (IPC), section 336, 304A, 304 leh 308 hmangtein thubuai theh luh a ni a, Dr. Khichi leh Dr. Aakash te hi May 27 khan man an ni.

Thuneitute chuan he naupang damdawi in hi phalna nei lo, license thi tawh hmanga kalpui a nih thu leh fire department aṭanga clearance nei loa kalpui a nih thu an sawi. Dr. Khichi leh Dr. Aakash te hi court-in hren turin thuchhuah siam mah se, doctor-te hian bail an dil a, bail an dilna hi June 3-ah ngaihtuah a ni ang.

May 26 zana Baby Care New Born Child Hospital kangah khan nausen pasarih an kanghlum a ni. An zingah pakhat hi ni 25-a upa niin, a dangte chu ni 6-15 inkarte an ni. Kangmei chhuah lai hian hengte bakah hian nausen panga dang an awm bawk a, midang pangate hi damdawi in dangah enkawl chhunzawm an ni.