India ramah khaw lum vanga thi mi 100 chuang awm tawh
Khaw lumin India ram state hrang hrang a tuam mek a, ram puma khaw lum avang thi hi May 31 thleng khan mi 100 an chuang tawh a, an zinga mi 61 hi hmar lam state-a mite an ni. Thi zingah hian Inrinnia Lok Sabha inthlan buaipuitu mi 23 an awm bawk.
Bihar, Rajasthan, Odisha, Uttar Pradesh leh Jharkhand-ah te khaw lum hi an tuar nasa zual a, Bihar bikah hian Pathianni zing thleng khan mi 14 an thi tawh a ni. Heng zinga mi 10 hi inthlan buaipuitute an nih thu state sorkar chuan a puang bawk. Bihar bakah Uttar Pradesh-a Mirzapur district-ah pawh mi 13 an thi tawh a, an vai hian Maa Vindhyavasini Autonomous State Medical College-ah admit niin, khaw lum avanga taksa lama symptoms lang chhuak vek an nih thu damdawi in thuneitute chuan an tarlang a ni. Heng bakah hian Jharkhand-ah chuan khaw lum avangin mi pali an thi a, mi 1,326 damdawi ina dah an ni bawk. Jharkhand-a damdawi in zawng zawngte chu khaw lum avanga damlote dahna turin AC room leh khum ruak nei vek tura hriattir an ni. Rajasthan-ah pawh khaw lum avang hian mi paliin nunna an chân tawh bawk a ni.
Khaw lum avanga thihna thlen tamna ber chu Odisha niin, Zirtawpni leh Inrinni bikah mi 54 an thi niin thuneitute chuan an puang. Odisha-a Balangir, Sambalpur, Jharsuguda leh Subarnapur district-ahte thihna hi a thleng nasa zual a, Chief Secretary, P.K. Jena leh Special Relief Commissioner, Satyabrata Sahu te chuan khaw lum avanga thihna thleng chungchang thlir letna neiin, mipute tana hriat tur thehdarh leh hrilhhriat bakah, inven dan thlenga nasa zawka mipui zirtirna nei turin an inbuatsaih a ni. Tin, Odisha-ah hian sikul, coaching institution leh anganwadi te chu June 8 thleng khar tur a nih thu state sorkar chuan a puang.
Khaw lum nasa zual tuar state zingah hian Haryana, Chandigarh, Delhi, Punjab, Madhya Pradesh, Chhattisgarh, Himachal Pradesh leh Andhra Pradesh te pawh an tel niin India Meteorological Department (IMD) chuan an tarlang a, khaw lum lam pawh 45 degree celcius leh a chung lam a ni hlawm a ni.