Jail a luh hmain Kejriwal-a'n Raj Ghat leh Hanuman temple a tlawh

Lok Sabha inthlan avanga bail-a chhuah, inthlan zawh hnua inpe leh tura hriattir, Delhi chief minister Arvind Kejriwal chuan nimin khan thuneitute hnena a inpek hmain Raj Ghat leh Hanuman temple te a tlawh.

Delhi excise policy thubuai avanga March 21-a man a nih hnuah Arvind Kejriwal hi Tihar jail-ah dah a ni a, excise policy thubuaia pawisa chheprelha puh a nihna chungchang ngaihtuah a nih laiin man a nihna hi khingin, bail a dil bawk a ni. Bail a dilna hi Supreme Court chuan ngaihtuahin, inthlan campaign leh thil dang avanga May 10-a chhuah a phalsak hnuah, inthlan zawh hnu, June 2-ah thuneitute hnena inpe leh turin a hriattir a ni. Kejriwal hian nimina Tihar jail-a a let hma hian Supreme Court hnenah bail-a chhuah a phalsak chu lawmawm a tih thu a sawi zui bawk.

Kejriwal hian X-ah amah a inpek leh tur thu hi post-in,"Vawiin hian Tihar jail-ah ka inpe leh tawh dawn a ni. Chawhnu dar 3-a in ka chhuahsan hnuah Raj Ghat ka tlawh anga, Mahatma Gandhi zahna chibai ka buk ang. Chumi zawhah Connaught Place-a Hanuman Temple tlawhin, malsawmna ka dil dawn a ni. Party office-a party hruaitute ka hmuh leh hnuah Tihar jail hi ka pan ang," tiin a tarlang.