Rahul Gandhi-a'n agniveer tan sipai pangngai hamṭhatna pek ngensak

Congess party hruaitu, Rahul Gandhi chuan president Droupadi Murmu hnenah ziaka ngenna thawnin, agnipath scheme kaltlanga sipai lak, agniveer-te chu indona hmuna an thihin an chhungte'n an lu man an tel chungchangah sipai pangngaite aia a danglam bik thu sawiin, hamṭhatna inang pe turin a ngensak.

President Murmu hnena Rahul Gandhi-a'n lehkha a thawnah hian ram tana nunna hlan ve tho, agniveer-te tan rorelna dik a phût tih tarlangin,"Thlan tlin sorkarin a thuneihna hnuaia hma a lakah President hi a inrawlh ngai lo tih chu hre mah ila, hemi chungchangah hian inrawlh turin ka ngen duh che a ni. "Agniveer-te hamṭhatna tlem bik hi thil ṭha lo tak a ni a, hemi thu-ah hian Supreme Commander of India Armed Forces i nihna angin, i dinhmun aṭanga he thil siam ṭhat hi ka ngen a ni," tiin a tarlang.

Rahul Gandhi chuan Jammu & Kashmir Rajouri-a rah puah bomb avanga Punjab mi agniveer sipai thi chhungte a kawm thu leh, amaha a chhungte innghah nasatzia ngaihtuah a, ram tana nunna a chân avanga a chhungte rethei takin a pension emaw, inenkawl chhunzawmna tur emaw, zirna leh hna chungchang thlengin chhawmdawlna engmah an neih loh thu a sawi a ni. Gandhi chuan, agniveer chu thil ṭha lo a nih thu leh, President Murmu chu rorelna dik a awm theih nana hma la tura a duh thu a sawi.